Tge signifitga l'utschella?

l'utschella, il logo da la Societad Svizra da las Paraulas SSP, è protegida cun ils dretgs d'autur e dastga vegnir duvrada mo per occurrenzas da la SSP u da la SEP.

L'utschella è vegnida creada da H. Ritter, professur per design a la Scola auta d'art e commerzi a Trier, ed è dapi il 1980 il signet uffizial da la Societad Europeica da las Paraulas SEP. Ella regorda cleramain ad ina sirena greca. Las sirenas èn enconuschentas dapi l'odissea da Homer. Cun lur moda fascinanta da s'exprimer, lur vuschs sonoras e lur chant irresistibel carmalavan ellas ils mariners che passavan sperasvi.

Il logo da l'utschella-sirena dissegnà en in stil cler e colurà cun alv, cotschen e nair correspunda al cuntegn da la paraula (l'enconuschientscha da l'origin dal mund) ed al stil da la paraula populara europeica (ina dimensiun, protagonists senza fatscha e profunditad mentala, isolaziun e colliaziun globala, emprova da cumpigliar il mund real e magic). L'uman-utschè (sirena, mattetta-cign u spus animalic, signura u signur dals animals) simbolisescha il clom magic che vegn or dal vair mund da paraulas, il mund invers, il mund da paraulas per propi.

Sco simbol regorda il logo a la veglia tradiziun da la paraula e dal raquintar. Sco quai che la paraula sezza lascha l'utschella in grond spazi a nossa fantasia ed a nossa interpretaziun.

Il logo da la SEP sa distingua tras il fund oransch dal logo da la SSP.